तिमी को हौ? को हौ तिमी ? तिमी के हौ ? के हौ तिमी ?
तिमीलाई पहिलोचोटि देख्दा लाग्यो–
मेरा हाराएका घामजून भेटेँ
तर तिमीले भन्यौ
यी त मेरा आँखा हुन् !
अँ त्यतिखेर
मेरो सपना पनि हराएको थियो
हेर्दै लाँदा
खोज्दै जाँदा
त्यो पनि तिमीमै भेटेजस्तो लाग्यो
तर फेरि तिमीले भन्यौ
यो त मेरो शरीर हो
मेरो आफ्नो फैलावट हो !
म रुँदा पनि
हाँस्दा पनि गुञ्जिरहने
मेरो संगीत हराएको थियो
अचानक एक दिन
तिम्रो ढुकढुकीमा भेटेजस्तो लाग्यो
तर तिमीले प्रमाणसहित भन्यौ
यो त मेरो हृदयको आवाज हो
त्यसरी एकएक गर्दै
मेरो सबैथोक हराएपछि
हराएको थियो मेरो खुसी पनि
हेर्दै जाँदा त्यो पनि
तिम्रो ओठहरुमा अल्झिएको पाएँ
तर फेरि तिमीले भन्यौ
यो त मेरो मुस्कान हो
अब म के भनौँ ?
के सोचौँ?
कतै तिमी मेरो अमूल्य सम्पतिको थुप्रो त हैनौ ?
कि मेरो सानो देशको
सानो झुप्रो हौ तिमी ?
भन न भन…
तिमी के हौ ?
तिमी को हौ ?
