‘आमा म पनि धेरै धनी छु नि,मसँग पनि स्तन र योनी छ’

२०७५ पौष ९ , सोमबार
लेखक–बीनु लुईंटेल

म हरेक गल्लीमा असुरक्षित छु आमा

त्यो सडक,घर, स्कुल, कलेज, चिया पसल

सबै सबै ठाउँमा ।

तिमी सोच्छौ होला आमा

सुनचाँदी, पैसा केही छैन छोरीसँग

कसरी असुरक्षित हँ रु

तर थाहा छ आमा तिमीलाई

आजभोलि छोरीसँग लुटिन धन हैन नी

स्तन र योनी हेरिन्छ ।

अनि आमा सानो हुँदा सकी नसकी

छोप्ने गरेका मेरा संवेदनशील अंगलाई

आजभोलि जताततै उदाङगो बनाइन्छ

क्षतविक्षत पारिन्छ

टोकिन्छ,काटिन्छ चलाइन्छ ।

आमा म पनि धेरै धनी छु नि

मसँग पनि स्तन र योनी छ

यसैले त म असुरक्षित छु ।

यसैले आमा म जुनसुकै बेला

टोकिन सक्छु

लुटिन सक्छु

अन्त्यमा विक्षिप्त भएर

पानीसमेत भन्न नपाई सधैको लागि निदाउँन सक्छु

तर

आमा म अहिले नै भन्छु नि

तिमी नरुनु है

बस चुपचाप चित्ता जलाउनू

किनकि तिमी गरीव छौं

न्याय किन्न सक्दिनौं मेरो लागि ।

यसैले आमा

म हरेक समय

हरेक ठाउँमा असुरक्षित छु ।

Source:agnijwala. com

प्रतिक्रिया दिनुहोस