पोखरा। सम्भावित प्राकृतिक विपद्को उच्च जोखिमलाई ध्यानमा राख्दै कास्की जिल्लाका सम्पूर्ण विद्यालयहरू असोज ८ र ९ गते दुई दिनका लागि बन्द गरिने भएको छ।
शिक्षा विकास तथा समन्वय इकाइ, कास्कीले एक सूचना जारी गर्दै जिल्लाका ५ वटै स्थानीय तहहरूसँगको छलफल र समन्वय पछि विद्यालयहरूमा बिदा दिने निर्णय गरिएको जनाएको छ। यो बिदालाई पछि बर्खे वा हिउँदे बिदाबाट समायोजन गरिनेछ।
जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार असोज ९, १० र ११ गते देशका विभिन्न स्थानमा भारीदेखि अति भारी वर्षा, उच्च पहाडी तथा हिमाली क्षेत्रमा हिमपात, हावाहुरी र चट्याङ पर्ने सम्भावना रहेको छ।
गण्डकी प्रदेश र विशेष गरी कास्की जिल्ला बाढी, पहिरो, डुबान, नदी कटान, हिमपहिरो तथा सडक अवरोधजस्ता विपद्को उच्च जोखिममा रहेकाले पूर्वतयारी स्वरूप यो कदम चालिएको इकाइ प्रमुख लोकनाथ आचार्यले जानकारी दिएका छन्।
विपद्को जोखिमबाट बच्न इकाइले अभिभावक, विद्यार्थी, शिक्षक तथा विद्यालय कर्मचारीहरूलाई जोखिमयुक्त क्षेत्र वा खोला-नदी किनारमा नजान र सतर्कता अपनाउन आग्रह गरेको छ। साथै, आपत्कालीन अवस्थामा सुरक्षित विद्यालय भवनहरूलाई अस्थायी आश्रयस्थलको रूपमा प्रयोग गर्ने व्यवस्था मिलाउन पनि निर्देशन दिइएको छ।
