पोखरा ।
पाेखरामा एकैदिन ७ जना पत्रकार पुरस्कृत हुने भएका छन् । पत्रकार महासंघ कास्कीले एकैदिन ७ पत्रकारलाई पुरस्कृत गर्ने भएको हाे ।
पुरस्कृत हुने पत्रकारहरु कुलचन्द्र न्यौपाने, ओम हमाल, सन्देश श्रेष्ठ, प्रकाश ढकाल, कृपा भण्डारी, टंक अधिकारी र दिनानाथ बराल हुन् । उनीहरु विभिन्न पुरस्कारबाट पुरस्कृत हुन लागेका हुन् ।
छनोट समितिले सिफारिस गरेको नाम महासंघ कास्कीको मंगलबार बसेको बैठकले अनुमोदन गरेको सचिव माधव बरालले जानकारी दिए ।
महासंघ कास्कीले प्रदान गर्ने गजेन्द्र भण्डारी सिर्जनशिल राष्ट्रिय पत्रकारित पुरस्कार २०७९ बाट कुलचन्द्र न्यौपाने, २०८० बाट ओम हमाल पुरस्कृत हुन लागेका हुन् । यो पुरस्कारको राशी नगद २५ हजार रुपैयाँ रहेको छ ।
टंकादेवी–तुलसीप्रसाद पत्रकारिता पुरस्कार २०७९ सन्देश श्रेष्ठ र २०८० प्रकाश ढकाललाई प्रदान गरिने महासंघ कास्कीका सचिव माधव वरालले जानकारी दिए । यस पुरस्कारको राशी २० हजार १ सय ११ रुपैयाँ छ ।
यस्तै २० हजार ५ सय ५५ रुपैयाँ राशीको जगन्नाथ सिग्देश युवा प्रोत्साहन पुरस्कार २०८० बाट कृपा भण्डारी पुरस्कृत हुन लागेकी हुन् ।
यसैगरी साेही दिन आर्थिक पत्रकारिता पुरस्कारबाट पत्रकार टंक अधिकारी र दिनानाथ बराल पुरस्कृत हुदैछन् ।
पत्रकारहरुलाई माघ १२ गते गण्डकी प्रदेशका मुख्यमन्त्री सुरेन्द्रराज पाण्डेको उपस्थितीमा पुरस्कृत गरिने महासंघ कास्की अध्यक्ष विमला भण्डारीले जानकारी दिईन् ।