पाेखरा । पोखरा महानगरपालिका १९ चुरुङ्गामा सञ्चालित श्रीदुर्गा पाञ्चायन मन्दिर प्रतिष्ठा तथा श्रीमद् देवी भागवत नवाह ज्ञानमहायज्ञ साेमबार सम्पन्न भएकाे छ ।
दश दिनसम्म चलेकाे महायज्ञमा १ कराेड ५ लाख रुपैयाँ संकलन भएकाे महायज्ञ मुल आयाेजक समितिका महासचिव विकास गाैतमले जानकारी दिए ।
महायज्ञकाे समापन कार्यक्रममा बाेल्दै गण्डकी प्रदेशका सामाजिक विकास मन्त्री विन्दुकुमार थापाले यस्ता यज्ञहरुले सभ्य समाज निर्माणमा भुमिका खेल्ने बताए ।
उनले धार्मिक क्षेत्र मठ,मन्दिर, सामुदायिक भवनहरुकाे संरक्षण गर्ने जिम्मेवारी र दायित्व आफू नेतृत्वको मन्त्रालयकाे भएकाे बताउँदै यस मन्दिरको भाैतिक पूर्वाधार निर्माणका लागि सहयाेग गर्ने प्रतिबद्वता समेत व्यक्त गरे ।
पाेखरा महानगरपालिका वडा नम्बर १९ का वडाअध्यक्ष पुष्पेन्द्र पाण्डेले चुरुङ्गाकाे दुर्गा मन्दिरले धार्मिक पर्यटन विकासमा भुमिका खेल्ने विश्वास ब्यक्त गरे ।
महायज्ञमा आर्थिक, नैतिक र भाैतिक रुपमा सहयाेग गर्नेहरुलाई कृतज्ञपत्र प्रदान गरिएकाे थियाे ।
महायज्ञमा महेश सन्यासी आश्रम देवघाट धामका संस्थापक डाक्टर रामानन्द गिरिजी महाराजले कथावाचन गरेका थिए । अन्य महायज्ञ अन्य भन्दा फरक रुपमा नवाह ज्ञान महायज्ञ संचालन भयाे । यहाँ कथा वाचन मात्रै भएकाले ज्ञान प्राप्त गर्ने यज्ञका रुपमा रह्याे ।
महायज्ञमा दैनिक मण्डप पुजा, कथावाचन, आरती र प्रसाद ग्रहण कार्यक्रम भए । यस्तै महायज्ञमा ५ सय सम्मको भेटी दान गर्नेहरूको दानपत्रमा नाम लेखियाे भने ५ लाखभन्दा बढि दान गर्नेहरूलाई आजीवन सदस्यसहित अभिनन्दन गरिएकाे महायज्ञ मूल आयोजक समितिका अध्यक्ष ढाकामोहन गौतमले जानकारी दिए ।
महायज्ञ मूल आयोजक समितिका महासचिव गौतमका अनुसार चुरुङ्गास्थित ब्रह्मा विद्यापीठ परिसरमा महेश सन्यासी आश्रम देवघाट धामका संस्थापक डाक्टर रामानन्द गिरिजी तथा विभिन्न सङ्घसंस्थाहरूको आर्थिक सहयोगबाट प्राप्त रु. २ करोड को लागतमा १३ वटा गजुर र भूमिगत गर्भ गृहसहितका ढुङ्गाको विशाल कलात्मक मन्दिर निर्माण गरिएको छ ।
मन्दिर निर्माणकार्यमा हालसम्म झण्डै एक करोड ७० लाख खर्च भैसकेको महासचिव गौतमले जानकारी दिए ।
