आज असार १५, दहीचिउरा खाने दिन, हेमजामा १७ औं असारे महोत्सव हुने

  • ख-
  • ख+

पोखरा । आज असार १५ । ‘मानो रोपेर मुरी उब्जाउने’ महिना मानिने असारको मध्य दिन आज धान दिवस संगै रोपाईं जात्राका रुपमा मनाउने गरिन्छ । आजको दिन खेतमा धान रोपाईं संगै आपसमा हिलो छ्यापाछ्याप गरेर मनोरञ्जन गर्ने तथा दही चिउरा खाने गरिन्छ । कामको चटारोले थकित भएका किसानलाई दही र चिउराले शक्ति र शीतलता प्राप्त हुने विश्वास छ । खेतीपाती बाहेक अन्य पेसा र व्यवसाय रहेकाहरुले पनि आज दही चिउरा खाई असार १५ मनाउँछन् ।

यसैबिच कोरोनाका कारण २ वर्ष स्थगित भएको असारे महोत्सव यो वर्ष पुनः सञ्चालन हुने भएको छ । पोखरा पर्यटन परिषद्को आयोजनामा हरेक वर्ष पोखरामा महोत्सव हुने गरेको थियो । तर कोरोना संक्रमणले २ वर्ष रोकिएकोमा अहिले पुनः निरन्तरता दिन लागिएको हो ।

यो वर्षको महोत्सव पोखरा २५ हेमजामा हुनेछ । माइस्थानमा रहेको करिब १० रोपनी क्षेत्रफलमा आज महोत्सव गर्न लागिएको परिषद्का अध्यक्ष गोपी भट्टराईले जानकारी दिए ।

हेमजाका तुलसी पौडेल, अग्निधर पौडेल, डिल्लीराम नेपाली, कृष्णबहादुर कुँवर, मैना केसी र प्रकाश पौडेलको खेतमा परिषद्ले रोपाई महोत्सव गर्न लागेको भट्टराईको भनाई छ ।

पोखरा सबै मौसममा घुम्ने बनाउन विभिन्न इभेण्ट आयोजना हुँदै आएको छ । बर्खाको समय पोखरामा पर्यटक कम हुने समय हो । त्यसैले पर्यटकलाई हरेक समय उपयुक्त छ भन्ने बनाउन महोत्सवको परिकल्पना गरिएको भट्टराई बताउँछन् ।

यसबाहेक सहरमा बस्ने नयाँ पुस्तालाई खेती प्रणालीका बारेमा जानकारी दिने उद्देश्य राखिएको छ । खेती योग्य जमिनको संरक्षण, कृषिलाई व्यवसायीकरण गर्दै कृषकलाई आफ्नो पेसाप्रति अभिप्रेरित गर्न महोत्सव गरिएको आयोजकले जनाएको छ ।

महोत्सवमा साउने प्रतियोगिता, हल गोरुको दौड, हिलोमा माछा समात्ने प्रतियोगिता, दौड, असारे गीत तथा रोपाइँ प्रतियोगिता, नेपाली र विदेशीलाई हिलोमा दौड प्रतियोगिता, उत्कृष्ट कृषक सम्मान लगायतका कार्यक्रमहरू हुने महोत्सवका संयोजक तथा परिषद्का उपाध्यक्ष पोमनारायण श्रेष्ठले जानकारी दिए ।

साउने प्रतियोगिता, असारे रोपाई र तीन प्रतियोगिताको प्रथम र दोस्रो हुनेले क्रमशः ७ हजार र ५ हजार रुपैयाँ पुरस्कार पाउनेछन् । महोत्सवमा ५ सय विदेशी सहित करिब १० हजारको उपस्थिति रहने आयोजकको अपेक्षा छ ।

कुनै सल्लाह, सुझाव वा प्रतिकृयाको लागि citypokhara.com@gmail.com मा इमेल पठाउन सक्नुहुन्छ ।
प्रतिक्रिया दिनुहोस्