लागुऔषध दुर्व्यसनीको संख्या घटदाे,चालू आ.वकाे नाै महिनामा ५८ वटा मात्रै मुद्धा दर्ता

पोखरा ।

कास्कीमा लागुऔषध दुर्व्यसनीको संख्या घटेको छ । चालु आर्थिक वर्ष २०७९/०८० को पहिलो नौ महिना सम्ममा ५८ वटा मात्रै मुद्धा दर्ता भएका छन् ।

प्रेस क्लब गण्डकीले बुधबार पोखरामा आयोजना गरेको “लागु औषध दुर्व्यसनी विरुद्ध सञ्चारकर्मीको भुमिका” विषयक सचेतना मुलक कार्यक्रममा आर्थिक वर्ष २०७७/०७८ मा १ सय ४९ थान र २०७८/०७९ मा २ सय ४३ थान मुद्धा दर्ता भएको तथ्यांक सार्वजनिक गरिएको थियो ।

अघिल्लो वर्षको तथ्यांक र चालु आ.व.को नौ महिनाको तथ्यांक हेर्दा लागुऔषध प्रयोगकर्ताको संख्या घटेको जिल्ला प्रहरी कार्यालय कास्कीका प्रहरी निरिक्षक तिलक मानन्धरले बताए।

अघिल्ला दुई वर्षको आधारमा अहिलेको नौ महिनामा दर्ता भएको मुद्धालाई विश्लेषण गर्दा घटेको देखिएको छ उनले भने, “अवको तीन महिनामा त्यती धेरै मुद्धा दर्ता हुने सम्भावना देखिदैन ।” त्यस्तै लागु औषध दुर्व्यसनकर्ताको उमेर अनुसार सबैभन्दा धेरै १५ देखि २४ वर्ष उमेर समुहका रहेका छन् । प्रहरी निरिक्षक मानन्धरका अनुसार १५ देखि २४ उमेर समुहका ५२ प्रतिशत रहेका छन् । भने ४२ प्रतिशत २५ देखि ३५ वर्षका रहेका रहेको उनले बताए ।

३१ प्रतिशत ११ र १२ कक्षाका विद्यार्थी दुर्व्यसनीमा फसेको प्रहरी निरिक्षक मानन्धले बताए । उनका अनुसार साथिसंगीहरुका कारण लतमा फस्नेहरुको संख्या दिन प्रतिदिन बढि रहेको प्रति अभिभावकहरु सचेत हुनु पर्ने देखिन्छ ।

उनले अभिभावकहरुले आफ्ना वालवालिकाका बारेमा हरदम जानकारी राख्ने, बालबालिकाको हालसालैको फोटो सधै साथमा राख्ने, बालबालिकाको पहिरन, हुलिया बारेमा जानकारी राख्ने, साथी–सँगीको बारेमा जानकारी राख्ने, फोन नंबर राख्ने र स्कुल/कलेज तथा अन्य रुटका बारेमा अभिभावकले सधै चनाखो भइ ध्यान दिनु पर्ने उल्लेख गरे ।

बालबालिकाको बद्लिदो व्यवहार प्रति चनाखो रहने, वालवालिका अपराधकर्म तर्फ प्रेरित हुनसक्ने बारेमा सजक रहनुपर्ने उनकाे सुझाव छ ।

आफना वालवालिकालाईे घरको वातावरण बालबालिकामैत्री बनाउने, प्रतिकुल अवस्था जस्तै विपद्, आपराधिक घटना, बन्धक बनाइएको अवस्था, हराएको अवस्था आदिमा हुनसक्ने सम्भावित खतरामा अपनाउनुपर्ने बताए ।

कार्यक्रममा पोखरा महानगरपालिका कार्यपालिका सदस्य एवं सामाजिक विकास समितका सदस्य धनकुमारी पोखरेल तिमिल्सिनाले लागु औषध बारे परिवारसम्मै सचेतना जगाउनुपर्ने खाँचो रहेको बताईन् । उनले कुलतमा बालबालिका फस्ने गरेको बताउदै त्यसबाट जोगाउन साझा प्रयास आवश्यक रहेको उल्लेख गरिन् ।

उनले लागु औषध सम्वन्धी विषयलाई नर्सरीदेखि नै पाठ्यपुस्तकमा समावेश गर्नसके रोक्न भुमिका खेल्ने बताईन्। लागुऔषध दुर्व्यसन रोक्न म र हामी भन्ने भावनाबाट सुरुवात गर्नुपर्नेमा उनकाे जोड छ ।

प्रेस क्लब गण्डकीका अध्यक्ष एकराज गिरीको अध्यक्षतामा भएको कार्यक्रममा उपाध्यक्ष राजाराम पौडेल र सचिव गौरव त्रिपाठीले सञ्चार माध्यम र सञ्चारकर्मीको भुमिका महत्वपूर्ण हुने भएकाले कार्यक्रम आयोजना गरिएको बताए ।