टाइगर ग्रुप अफ पोखरा नेपालको आयोजनामा माघ १ गते (भोली) बाट सुरु हुने उक्त प्रतियोगिताको पूर्व सन्ध्यामा टेक्निकल मिटिङ सम्पन्न भएको हो ।
अध्यक्ष शर्माले भने–“विगतका सस्करणहरुबाट पाठ सिक्दै हामी यहाँ सम्म आइपुगेका छौं । सबै टिम तथा खेलाडीहरुले अनुशासित र मर्यादित भएर आफ्नो खेल प्रदर्शनका लागि आग्रह गर्दछु ।”
यस्तै नेपाल भलिबल संघका उपाध्यक्ष याम बहादुर गुरुङले प्रतियोगितालाई सफल बनाउन सबै टिमहरुको उत्तिकै महत्वपूर्ण भूमिका रहेको जनाउँदै त्यस अनुसार अघि बढ्न आग्रह गरे ।
सो अवसरमा संस्थाका सचिव डिवी नेपाली, प्रतियोगिताका रेफ्रि संयोजक एवं रेफ्रि डेलिगेट टहलसिंह थापा मगरले समेत प्रतियोगिताका विभिन्न पक्ष बारे टिमका प्रतिनिधीहरुलाई जानकारी गराउँदै सबैको साथ र सहयोगले नै प्रतियोगिता भब्य रुपमा सम्पन्न हुनेमा आफूहरु विश्वस्त रहेको उल्लेख गरे ।
यसै गरी हरेक खेल पश्चात पोष्ट म्याच कन्फ्रेन्स हुने प्रतियोगिता प्रचार प्रचार संयोजक इन्द्र पौडेलले जनाएका छन् ।
नेपाल भलिबल संघको स्विकृतीमा हुने चौथो टाइगर कपमा पहिलो पटक सहभागिता जनाउन भारत हरियाणाको महिला टिम पोखरा आइपुगेको छ ।
त्यसै गरी पुरुषतर्फ श्रीलंकाको आर्मी टिम पहिलो पटक पोखरा आएको छ भने प्रतियोगितामा सहभागि हेल्प नेपाल स्पोर्टस क्लबले समेत तीन जना पाकिस्तानी खेलाडी टिममा भित्राएको छ ।
प्रतियोगितामा महिला तथा पुरुषतर्फ उपाधि विजेता टिमले ट्रफी, मेडल तथा प्रमाणपत्रसहित समान नगद रु ५ लाख ५५ हजार ५ सय ५५ र उपविजेता टिमले समान नगद रु २ लाख ५५ हजार ५ सय ५५ तथा तेश्रो हुने टिमले १ लाख २५ हजार ५ सय ५५ प्राप्त गर्नेछन् ।
प्रतियोगिताको उद्घाटन भोली माघ १ गते गण्डकी प्रदेशका मुख्यमन्त्री सुरेन्द्रराज पाण्डेले गर्नेछन् । उद्घाटन खेल उपाधि बिजेता गण्डकी प्रदेश भलिबल संघ र नेपाल आर्मीको त्रिभुबन क्लबका बिच हुनेछ ।