काठमाडौं । साहित्यकार युवराज भण्डारीका दुई कृति क्यानडामा विमोचन गरिएको छ । नेपाली साहित्य समाज क्यानडाले टोरन्टोमा आयोजना गरेको समारोहमा कविता संग्रह ‘अर्को कर्नाली’ र गजल संग्रह ‘भावनाको तस्वीर’को साहित्यकार हेम अधिकारी, नेपाली साहित्य सामाज अध्यक्ष खेम गुरागाईं र कोषाध्यक्ष पारू पाण्डेले संयुक्त रूपमा लोकार्पण गरे ।
कार्यक्रममा कविता संग्रह ‘अर्को कर्नाली’माथि समीक्षा गर्दै कवि रविन थपलियाले भने, ‘यो संग्रहमा जीवनको विविध पाटा अनि सामाजिक विषयवस्तु सारगर्भित र चित्ताकर्षक तवरले प्रस्तुत भएका छन् ।’
क्यानडामै बसोबास गर्दै आएका भण्डारी पेशाले इन्जिनियर हुन् । उनको पहिलो साहित्यिक कृति ‘नारीको आवाज’ (तीजगीत संग्रह २०४७) प्रकाशित भएको थियो । ‘अर्को कर्नाली’ र ‘भावनाको तस्वीर’ भुँडीपुराण प्रकाशनले बजारमा ल्याएको हो ।
