पोखरा । मोफसलको बहुप्रतिष्ठित राष्ट्रिय तथा अन्तराष्ट्रिय अन्तर क्लव स्तरिय आमन्त्रित आहा ! रारा गोल्डकप फुटबल प्रतियोगिताको १९ औं संस्करण चैत २१ गतेदेखि हुने भएकाे छ ।
आयाेजक सहारा क्लव पाेखराले शनिवार पत्रकार सम्मेलनमार्फत प्रतियाेगिताबारे जानकारी गराएकाे हाे ।
चैत २८ गतेसम्म चल्ने आरा रारा गोल्डकपमा १ विदेशीसहित ८ टिमकाे सहभागीता रहने अध्यक्ष केशबबहादुर थापाले जानकारी दिए ।
सहभागी हुने क्लवहरु
१. नेपाल आयल निगम मनाङ्ग म¥याङ्गदी क्लब,
२. नेपाल पुलिस क्लब,
३. रुस्लान थ्रिस्टार क्लब,
४. नेपाल ए. पि. एफ. क्लब,
५. संकटा क्लब,
६. मछिन्द्र क्लब,
७. अफ्रिकन रुट एसोएसन, डउला, क्यामरुन
८. सहारा क्लब पोखरा
‘कोरोना माहामारीका कारण प्रतियोगिताको मिति केही पछाडि धकेलियो भने केही प्रतियोगी टिम पनि आउन पाएनन्,’ अध्यक्ष थापाले भने । अघिल्ला संस्करणमा १२ टिमले सहभागी हुन्थे ।
पोखरा रंगशालामा हुने प्रतियोगिताको उपाधि जित्नेले १० लाख १ हजार नगदसहित ट्रफी, मेडल र प्रमाणपत्र प्राप्त गर्ने छ भने उपविजेताले ५ लाख १ हजार नगद सहित ट्रफी र प्रमाणपत्र प्राप्त गर्ने छ ।
प्रतियोगिताको मुख्य प्रायोजक हिमश्री फुड्सका अध्यक्ष सूर्यबहादुर केसीको यसै वर्ष निधन भएकाले उत्कृष्ट पाँच विधाको पुरस्कार उनै केसीलाई समर्पण गरिने आयोजकले जनाएको छ ।
सहाराले सर्वोत्कृष्ट राष्ट्रिय फुटबल खेलाडी २०७७ बाट एक जना राष्ट्रिय खेलाडीलाई सम्मान गर्ने छ । ३५ हजार, प्रमाणपत्र र दोसल्लासहित उत्कृष्ठ खेलाडी सम्मान प्रदान गरिने अध्यक्ष थापाले बताए ।
प्रतियोगितामा करिब १ करोड १ लाख ८१ हजार रुपैयाँ खर्च हुने र १ करोड २९ लाख १ हजार आम्दानी हुने अनुमान गरिएको महासचिव रामजीप्रसाद अधिकारीले जानकारी दिए ।
बचत रकमबाट क्लबले सहारा फुटबल एकेडेमीको सञ्चालनार्थ खर्च गर्दै आएको छ । हाल तेश्रो व्याचको एकेडेमीमा १४ जिल्लाका २४ जना बालकहरु आश्रित छन् ।
विगत २०७० साल देखि उनीहरु आवसिय रुपमा स्वास्थ्य, शिक्षा दिक्षा लगायत फुटबल प्रशिक्षण समेत सहारा फुटबल एकेडेमी गण्डकी प्रदेश, पोखरा—१७, दोविल्लामा प्रदान गर्दै आईरहेको छ ।
सहारा क्लबले क्याराभान गोल्ड कपसहित २० वर्षदेखि पोखरामा फुटबल प्रतियोगिता सञ्चालन गर्दै आइरहेको छ ।
