पोखरा । राष्ट्रिय स्वतन्त्र पार्टी (रास्वपा) का सभापति र प्रतिनिधि सभा सदस्य रवि लामिछानेलाई कास्की जिल्ला अदालतमा दायर भएको सम्पत्ति शुद्धीकरण (मनी लाउन्डरिङ्ग), सहकारी ठगी र संगठित अपराधका आरोपमा निलम्बन गरिएको छ।
प्रतिनिधि सभा सचिवालयका महासचिव पद्मप्रसाद पाण्डेयले सोमबार एक सूचना जारी गर्दै लामिछानेको निलम्बनको जानकारी दिएका हुन्।
सूचनामा भनिएको छ, “सम्पत्ति शुद्धीकरण (मनी लाउन्डरिङ्ग) निवारण ऐन, २०६४ को दफा २७ अनुसार कुनै राष्ट्रसेवक वा संगठित संस्थाको पदाधिकारीमाथि आरोप दायर भएमा उनी स्वतः निलम्बित हुने व्यवस्था रहेको छ।”
लामिछानेविरुद्ध कास्की जिल्ला अदालतमा सहकारी ठगी, संगठित अपराध र सम्पत्ति शुद्धीकरणको आरोपमा अभियोगपत्र दर्ता भएको छ। अदालतमा विचाराधीन मुद्दामा लामिछानेलाई दोषी ठहर गरेमा कानूनी सजायको सामना गर्नु पर्नेछ।
उनको निलम्बन संसद नियमावलीअनुसार गरिएको हो, जसमा संसद अधिवेशन नभएको अवस्थामा निलम्बन पत्र टाँस गर्नुपर्ने व्यवस्था छ। संसद सचिवालयले जारी गरेको सूचनामा भनिएको छ, “प्रचलित कानूनी व्यवस्थाअनुसार, संगठित संस्थाको पदाधिकारी वा राष्ट्रसेवक माथि मुद्दा दायर भएमा त्यसको किनारा नभएसम्म उनी स्वतः निलम्बित मानिन्छ।”
सहकारीको बचत अपचलन र सम्पत्ति शुद्धीकरणको आरोपमा लामिछानेको सांसद पदको भविष्य अनिश्चित बनेको थियो। लामिछानेको सांसद पदको निलम्बनको निर्णय पछि अब अदालतको निर्णयको आधारमा आगामी कदमहरू तय हुनेछन्।
