पोखरा । जिल्ला कास्कीको पोखरा महानगरपालिका वडा नं. ५ शान्तिनगरचोकमा लागूऔषधको अवैध कारोबार भइरहेको गोप्य सूचनाको आधारमा प्रहरीले दुई जनालाई पक्राउ गरेको छ।
लागूऔषध नियन्त्रण ब्यूरो शाखा कार्यालय पोखरा र वडा प्रहरी कार्यालय बैदामको संयुक्त टोलीले यो अपरेशन गरेको हो।
पक्राउ पर्नेमा पर्वत जिल्लाको कुस्मा नगरपालिका वडा नं. १२ ठुलीपोखरी स्थायी ठेगाना भई हाल पोखरा महानगरपालिका वडा नं. ४ नालाकोमुख बस्ने २६ वर्षीया सीमा दर्जी र सोही ठेगानाका २६ वर्षीय आशिष श्रेष्ठ रहेका छन्।
प्रहरीले उनीहरूको साथबाट कालो झोलामा लुकाइछिपाइ राखिएको अवैध लागूऔषध बुप्रिनर्फिन १६७ एम्पुल, डाइजापाम १६८ एम्पुल, र फेनरागन १६६ एम्पुल गरी जम्मा ५०१ एम्पुल बरामद गरेको छ। साथै, उनीहरूको साथबाट तीन थान मोबाइल फोन पनि फेला परेको छ।
प्रहरीले पक्राउ परेका दुवै जनालाई नियन्त्रणमा लिई कास्की जिल्ला अदालतबाट लागूऔषध सम्बन्धी मुद्दामा ६ दिनको म्याद थप गरी अनुसन्धान प्रक्रिया अगाडि बढाएको छ।
