काठमाडौं । जेनजी पुस्ताको नाममा भएको आन्दोलनपछि उत्पन्न असहज परिस्थितिप्रति प्रेस चौतारी नेपाल गम्भीर बनेको छ । आन्दोलनका क्रममा प्रहरी गोली लागेर ३० जनाको ज्यान जानु, स्कुले पोशाकमा रहेका विद्यार्थीसमेत मारिनु र प्रधानमन्त्रीको राजीनामापछि पनि सार्वजनिक तथा निजी सम्पत्तिमा आक्रमण, तोडफोड, आगजनी र लुटपाट हुनुले चौतारी स्तब्ध भएको जनाएको छ ।
प्रेस चौतारीले बुधबार विज्ञप्ति जारी गर्दै वर्तमान संसद र संविधानकै परिधिमा रहेर सरकार गठनसहितका प्रक्रिया अघि बढाउन आग्रह गरेको छ । साथै, संविधानले प्रदत्त नागरिक अधिकार, प्रेस तथा अभिव्यक्ति स्वतन्त्रता र मानवअधिकारका अन्तर्राष्ट्रिय मान्यताहरुको अभ्यासमा जोड दिएको छ ।
सञ्चारकर्मीमाथि आक्रमण
चौतारीले आन्दोलनको क्रममा सञ्चारकर्मी र सञ्चारमाध्यममाथि आक्रमण हुनु दुःखद भएको बताएको छ । “जनतालाई सुसूचित गराउन खटिएका पत्रकारमाथि भएको आक्रमण र सञ्चारमाध्यममा गरिएको तोडफोड, आगजनी र आतंकपूर्ण गतिविधिको हामी कडा शब्दमा भर्त्सना गर्दछौं,” विज्ञप्तिमा उल्लेख छ ।
पत्रकारमाथि धम्कीप्रति चिन्ता
लोकतन्त्रको रक्षा र प्रेस स्वतन्त्रताको पक्षमा सक्रिय चौतारीका अध्यक्ष गणेश पाण्डे, निवर्तमान अध्यक्ष गणेश बस्नेत र केन्द्रीय सदस्य सुमन ढुंगानालाई जेन्जी आन्दोलनका नाममा अराजक समूहले धम्की दिएको घटनाप्रति संगठन गम्भीर बनेको छ । उनीहरूसहित अन्य पत्रकारलाई पनि धम्की र चेतावनी आएको विवरण प्राप्त भएको चौतारीले जनाएको छ ।
“लोकतन्त्रमा आफ्ना विचार राख्ने पूर्ण अधिकार हुन्छ, तर पत्रकारमाथिको धम्की लोकतान्त्रिक मूल्य र प्रेस स्वतन्त्रतामाथिको गम्भीर प्रहार हो,” चौतारीको भनाइ छ । यस्ता आपराधिक मनोवृत्तिका व्यक्तिमाथि कानुनी कारबाही गर्न र पत्रकारलाई सुरक्षा दिन राज्यसँग माग गरिएको छ ।
समाचार संकलन सहज बनाउन माग
प्रेस स्वतन्त्रता, लोकतन्त्र र शान्तिपूर्वक लेख्न तथा बोल्न पाउने अधिकारको पक्षमा निरन्तर लडिरहने प्रतिवद्धता जनाउँदै चौतारीले घाइते सञ्चारकर्मीको शीघ्र स्वास्थ्य लाभको कामना गरेको छ । साथै, उपचारको यथोचित व्यवस्था गर्न र समाचार संकलन निर्वाध बनाउन राज्यका सबै निकाय र नेपाली सेनालाई अपील गरेको छ ।
महासचिव हिरामान लामाले हस्ताक्षर गरेको विज्ञप्तिमा संकटपूर्ण अवस्थामा पनि पत्रकारले सुरक्षित रहेर सञ्चारकर्ममा लाग्नुपर्नेमा जोड दिइएको छ ।
