रुकुमपूर्व । राष्ट्रिय स्वतन्त्र पार्टी (रास्वपा)की समानुपातिक सांसद् रिमा विश्वकर्माले नेपालको राजनीतिक इतिहास बुझ्न र राजनीति सिक्न रुकुमपूर्व आउनुपर्ने बताएकी छन्।
भूमे गाउँपालिकामा आयोजित कर्मचारीसँगको अन्तरक्रिया कार्यक्रममा उनले रुकुमपूर्वलाई राजनीतिक चेतना र परिवर्तनको केन्द्रका रूपमा उल्लेख गर्दै देशका सबै राजनीतिक दलका नेता–कार्यकर्ताले यहाँको इतिहास बुझ्न आवश्यक रहेको बताइन्।
जनयुद्धको आधार क्षेत्रका रूपमा परिचित रुकुमपूर्वले मुलुकको राजनीतिक परिवर्तनमा महत्वपूर्ण भूमिका खेलेको स्मरण गर्दै उनले स्थानीय तहको अवस्था बुझ्न र जनताका गुनासा सुन्न आफू जिल्लामा आएको जानकारी दिइन्।
