पोखरा । चितवनमा पहिलो पटक महिलाहरूले मात्र गाडी चलाएर र्याली र दौड प्रतियोगिता गरेका छन्। यो कार्यक्रम चैत्र २५ गते सोमबार चितवनमा सकिएको छ। बागमती प्रदेश अटोमोबाइल्स एसोसिएसन र नेपाल अटोमोबाइल्स एसोसिएसनले यो आयोजना गरेका हुन्। यो र्यालीले महिलाहरूलाई बलियो बनाउने, साहसिक खेल र गाडीबाट घुम्ने पर्यटनलाई प्रोत्साहन गर्ने उद्देश्य राखेको थियो।
सोमबार बिहान भरतपुरको उद्योग वाणिज्य संघबाट सुरु भएको र्याली पोखरा बसपार्क, पुल्चोक, मंगलपुर, रामपुर, चनौली, मेघौली हुँदै गोलाघाट पुगेको थियो। त्यहाँबाट फेरि बाराही होटल चोक, मेघौली एयरपोर्ट, कसरा चोक हुँदै रिभर बैंक जंगल रिसोर्टमा पुगेर पहिलो चरण सकियो। त्यसपछि र्याली बिसहजारी ताल हुँदै सौराहाको चित्रसारी मैदानमा पुग्यो। त्यहीँ महिलाहरूले गाडी दौडाउने प्रतियोगिता पनि भयो।
यो कार्यक्रम नेपाल अटोमोबाइल्स एसोसिएसनका अध्यक्ष दशरथ रिसाल, गोविन्द भट्टराई, राजन पिया, सुमन कुमार शाक्य र गोपाल भट्टराईले झन्डा हल्लाएर सुरु गरेका थिए। सबै सहभागीले यो कार्यक्रम देखेर खुसी भए। र्याली सकिएपछि रिभर बैंक जंगल रिसोर्टमा दिनेश कठायत र प्रज्ञा कँडेलले आफ्नो गाडी यात्राको अनुभव सुनाए। कमला क्षेत्रीले कार्यक्रम सञ्चालन गरेकी थिइन्।
टाइम, स्पिड र डिस्टेन्स (टीएसडी) र्यालीमा नैना श्रेष्ठ मास्के र रोमासा शिवाकोटी पहिलो भए। शोभा बराइली र रेनु तामाङ दोस्रो र चन्दना कोइराला र आशा देवी श्रेष्ठ तेस्रो भए। उनीहरूले गाडी चलाउने र बाटो देखाउने काम गरेका थिए। त्यस्तै, अटो जिमखाना दौडमा अनिता श्रेष्ठ पहिलो, कल्पना पौडेल दोस्रो र सावित्री रेग्मी तेस्रो भए।
राष्ट्रिय खेलकुद परिषद्, भरतपुर र रत्ननगर नगरपालिका, चितवन अटोमोबाइल डिलर एसोसिएसन, रोटरी क्लब र महिला जेसिसले यो कार्यक्रममा सहयोग गरे। आइतबार भरतपुरमा गाडी चलाउने तालिम पनि दिइएको थियो। समापनमा दशरथ रिसाल, दिप्रश शाक्य, सन्तोष प्रसाद न्यौपाने, गोविन्द भट्टराई र राजन पियाले विजेतालाई पुरस्कार र प्रमाणपत्र दिए। कम्पनीहरूले पनि उपहार दिए।
राजन पियाले सबै सहभागी र सहयोगीलाई धन्यवाद दिँदै आगामी दिनमा पनि यस्तै कार्यक्रम गर्ने बताए। उनले महिलालाई बलियो बनाउने, साहसिक खेल र सडक सुरक्षाको कुरालाई जोड दिने प्रतिबद्धता जाहेर गरे। यो कार्यक्रमले चितवनमा गाडी खेल र पर्यटनको नयाँ सम्भावना देखाएको छ।
